ລາວ ບໍ່ພົບຜູ້ຕິດເຊື້ອໄວຣັດ ໂຄວິດ-19 ເພີ່ມ 31 ວັນແລ້ວ

ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ການແຜ່ລະບາດ ຂອງພະ ຍາດ​ອັກ​ເສບ​ປອດ ​ທີ່​ເກີດ​ຈາກ​ເຊື້ອ ຈຸລະ​ໂລກ​ສາຍ​ພັນໃໝ່ COVID-19 ຢືນຢັນວ່າ: ນັບ​ແຕ່​ວັນ​ທີ 13 ​ເມສາຫາ 13 ພຶດສະພາ 2020, ສປປ ລາວ ບໍ່​ພົບ​ຜູ້​ຕິດ​ເຊື້ອ​ໄວຣັດ ​ໂຄ​ວິດ-19 ​ເພີ່ມ​ໃໝ່ອີກ, ຕົວ​ເລກ​ສະ​ສົມຍັງ​ຢູ່ 19 ກໍລະນີ, ນັບ​ເປັນ​ເວລາ 31 ມື້ຕິດ​ຕໍ່​ກັນທີ່​ກວດ​ບໍ່​ພົບ​ເຊື້ອ, ມາ​ຮອດ​ປັດຈຸບັນ ມີ​ຜູ້​ປິ່ນປົວ​ດີ 14 ຄົນ, ຍັງ​ສືບ​ຕໍ່​ປິ່ນປົວ​ຢູ່​ໂຮງໝໍ 5 ຄົນ. ຂະນະ​ທີ່​ທົ່ວ​ໂລກຕົວ​ເລກ ​ຜູ້​ຕິດ​ເຊື້ອຍັງ​ເພີ່ມ​ຂຶ້ນ​ໃນ​ແຕ່​ລະ​ວັນ, ມາຮອດເວລາ 6:00 ໂມງເຊົ້າ ຂອງວັນທີ 13 ພຶດສະພາ 2020, ມີຜູ້ຕິດເຊື້ອ 4.330.027, ເສຍຊີວິດ 291.911, ປິ່ນປົວຫາຍດີ 1.575.558, ມີບາງປະເທດ ຈຳນວນ ຜູ້ຕິດເຊື້ອມື້ດຽວ ມີເຖິງ 20.564 ຄົນ, ເສຍຊີວິດ 1.466 ຄົນຕໍ່ມື້.


ທ່ານ ຮສ. ດຣ. ພູທອນ ​ເມືອງ​ປາກ ຮອງ​ລັດຖະມົນຕີ​ ກະຊວງ​ສາທາລະນະ​ສຸກ, ຜູ້​ປະຈຳ ການ​ຄະນະ​ສະ​ເພາະ​ກິດ ລາຍ​ງານ​ໃຫ້​ຮູ້ ​ໃນ​ພິທີ​ຖະ​ແຫລ​ງຂ່າວ ​ໃນ​ວັນ​ທີ 13 ພຶດສະພາ 2020 ນີ້​ວ່າ: ແຕ່ເດືອນມັງກອນ ຮອດ​ປັດຈຸບັນ ໄດ້ເກັບຕົວຢ່າງມາກວດທັງໝົດ 3.975 ຕົວຢ່າງ, ກວດພົບເຊື້ອສະສົມ 19 ຄົນ, ສະ​ເພາະ​ ວັນທີ 12 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 100 ກວ່າຄົນ ຊຶ່ງເປັນແຮງງານລາວ ທີ່ກັບມາຈາກປະເທດໄທ 65 ຄົນ, ແຮງງານໄທທີ່ເຂົ້າມາລາວ 2 ຄົນ ແລະ ບຸກຄົນທົ່ວໄປບໍ່ມີ ອາການສະແດງ 30 ຄົນ, ທັງ​ໝົດ​ແມ່ນ​ບໍ່​ພົບ​ເຊື້ອ. ສຳລັບກໍລະນີ ນ້ຳເບີ 14 ທີ່ເອົາກັບຄືນມານອນ ຕິດຕາມອາການຢູ່ໂຮງໝໍ ໄດ້ກວດວິເຄາະຫາເຊື້ອ ສອງຄັ້ງ ຕິດຕໍ່ກັນ ​ແມ່ນບໍ່ພົບເຊື້ອ ແລະ ໄດ້ອະນຸຍາດໃຫ້ອອກໂຮງໝໍ​ແລ້ວ.


ທ່ານ ຮສ. ດຣ. ພູທອນ ​ເມືອງ​ປາກ ​ກ່າວ​ອີກ​ວ່າ: ບັນຫາສຳຄັນໃນໄລຍະຜ່ອນຜັນ ບາງມາດຕະການຮອດວັນທີ 17 ພຶດສະພານີ້ ແມ່ນການເຝົ້າລະວັງ ຜູ້ເດີນທາງເຂົ້າມາ ສປປ ລາວ, ທຸກຄົນຈະຕ້ອງໄດ້ກວດກັ່ນ ກອງຊອກຫາ ເຊື້ອພະຍາດ ບໍ່ໃຫ້ມີຜູ້ຕິດເຊື້ອສາມາດ ອອກໄປຫາຊຸມຊົນ, ຈຳກັດບໍລິເວນຢູ່ສູນຈົນຄົບ 14 ວັນ. ສ່ວນການ ເຝົ້າລະວັງ ຕິດຕາມການປະຕິບັດ ຄຳແນະນຳຂອງປະຊາຊົນ ຢູ່ແຕ່ລະແຂວງ ເຫັນວ່າມີຄວາມຮັບຮູ້, ຄວາມເຂົ້າໃຈ ແລະ ເປັນເຈົ້າການປະຕິບັດ ຄຳແນະນຳຂອງ ຄະນະສະເພາະກິດໄດ້ດີ, ສະນັ້ນ ຈຶ່ງມີຄວາມໝັ້ນໃຈວ່າບໍ່ມີ ຄວາມສ່ຽງທີ່ຈະເກີດ ການລະບາດຄັ້ງໃໝ່.

ຂ່າວ: ທະນູ​ທອງ , ຂປລ.

ພາບ:ອ່າຍຄຳ

ທ່ານບໍ່ມີສິດສຳເນົາ ບົດຄວາມນີ້ໄດ້ ສົນໃຈບົດຄວາມຕິດຕໍ່ ຜູ້ດູແລລະບົບຖ້າສົນໃຈບົດຄວາມນີ້