ເນື່ອງຈາກວ່າເມືອງວິລະບູລີ ໄດ້ຮັບອິດທິພົນຈາກພາຍຸໝູນເຂດຮ້ອນຈາກທະເລຈີນໃຕ້ ເຮັດໃຫ້ເກີດມີຝົນຕົກໜັກໃນໄລຍະ 2 ວັນທີ່ຜ່ານມາ ຈຶ່ງເຮັດໃຫ້ປະລິມານນໍ້າຕາມລໍາຫ້ວຍ ແລະ ລໍາເຊສາຍຕ່າງໆໄດ້ເພີ່ມຂຶ້ນຢ່າງໄວວາ ແລະ ໄຫຼລົ້ນເຂົ້າຖ້ວມໄຮ່ນາຮົ້ວສວນ ແລະ ໜອງປາຂອງພໍ່ແມ່ປະຊາຊົນໃນຫຼາຍພື້ນທີ່ຂອງເມືອງວິລະບູລີ ເຮັດໃຫ້ເຂົ້ານາທີ່ພວມເກັບກ່ຽວໄດ້ຮັບຄວາມເສຍຫາຍ ຟ່ອນເຂົ້າໄຫຼໄປຕາມກະແສນໍ້າ; ພ້ອມທັງໄດ້ຖ້ວມສາຍທາງຕ່າງໆເຮັດໃຫ້ການສັນຈອນໄປມາລະຫວ່າງບ້ານຫາບ້ານ, ບ້ານຫາເມືອງ ແລະ ເມືອງຫາເມືອງ ບໍ່ສາມາດໄປມາໄດ້ດ້ວຍລົດ ເສັ້ນທາງຫຼາຍຈຸດຖືກຕັດຂາດ.
ເມື່ອເຫັນໄດ້ຄືແນວນັ້ນ ທາງການນໍາຂັ້ນເມືອງກໍ່ໄດ້ຮີບຮ້ອນໃຈລົງຕິດຕາມເບິ່ງສະພາບການດັ່ງກ່າວຢ່າງຮີບດ່ວນ ໃນຕອນເຊົ້າຂອງວັນທີ 8 ຕຸລາ 2020 ນີ້ ເຊິ່ງນໍາໂດຍທ່ານ ຄໍາຜຸຍ ສີບຸນເຮືອງ ກໍາມະການພັກແຂວງເລຂາພັກເມືອງ ເຈົ້າເມືອງວິລະບູລີ ພ້ອມດ້ວຍຄະນະ ປະກອບມີ : ຫ້ອງວ່າການເມືອງ, ຫ້ອງການໂຍທາທິການ ແລະ ຂົນສົ່ງ ແລະ ຫ້ອງການກະສິກໍາເມືອງ ກໍ່ໄດ້ພ້ອມກັນລົງຕິດຕາມເບິ່ງສະພາບການນໍ້າຖ້ວມໃນເບື້້ອງຕົ້ນຢູ່ເມືອງ ວິລະບູູລີ ໂດຍສະເພາະກໍ່ແມ່ນຕາມສາຍທາງ 28 ເອ ເຊັ່ນວ່າ : ຈຸດສາມຫຼ່ຽມທາງເຂົ້າບໍ່ຄໍາ, ຈຸດຫ້ວຍແຢງບໍລິສັດຄູນໄຊ, ຈຸດຫ້ວຍຄຽງທາງໄປບ້ານ ຫ້ວຍດ່າງ ແລະ ຈຸດຂົວຫ້ວຍຊວ້ານ ທັງນີ້ກໍ່ເພື່ອປະເມີນເບິ່ງລະດັບນໍ້າໃນແຕ່ລະຈຸດເພື່ອປະເມີນຄວາມສ່ຽງ ແລະ ກະກຽມຄວາມພ້ອມດ້ານຕ່າງໆເພື່ອໃຫ້ການຊ່ວຍເຫຼືອປະຊາຊົນ ທີ່ຢູ່ໃນພື້ນທີ່ໄພອັນຕະລາຍ ໃຫ້ຢູ່ໃນຈຸດທີ່ປອດໄພ ແລະ ໃນປະຈຸບັນນີ້ເສັ້ນທາງ 28 ເອ ອອກສູ່ເມືອງເຊໂປນແມ່ນບໍ່ສາມາດສັນຈອນໄປມາໄດ້ແລ້ວ.
ສໍາລັບຢູ່ເມືອງວິລະບູລີ ກໍ່ແມ່ນພື້ນທີ່ໜຶ່ງທີ່ຢູ່ໃນເຂດໄດ້ຮັບອິດທິພົນຈາກພາຍຸ ເຮັດໃຫ້ມີຝົນຕົກໜັກມາແຕ່ຕອນເຊົ້າຂອງວັນທີ 7 ຕຸລາ 2020 ທີ່ຜ່ານມາຈົນຮອດປະຈຸບັນກໍ່ບໍ່ທັນຢຸດເຊົາ ຈຶ່ງເຮັດໃຫ້ລະດັບນໍ້າໃນສາຍນໍ້າຕ່າງເພີ່ມຂຶ້ນສູງ ເຊັ່ນວ່ານໍ້າເຊກອກ, ເຊນ້ອຍ, ເຊບາຍ, ນໍ້າຫ້ວຍຄຽງ, ນໍ້າຫ້ວຍຊວ້ານ ແລະ ສາຍນໍ້າອື່ນໆ ກໍ່ໄດ້ເພີ່ມຂຶ້ນຢ່າງໄວວາ ເຮັດໃຫ້ນໍ້າໄຫຼລົ້ນເຂົ້າທົ່ງນາຮົ້ວສວນພື້ນທີ່ທໍາການຜະລິດຂອງປະຊາຊົນ ເຮັດໃຫ້ມີຜົນເສຍຫາຍຫຼາຍສົມຄວນ ໂດຍສະເພາະເຂົ້ານາທີ່ຢູ່ໃນໄລຍະຂອງການເກັບກ່ຽວ ທີ່ຈົມຢູ່ພື້ນນໍ້າ ແລະ ໄຫຼຖ້ວມສາຍທາງຕ່າງໆ ເຮັດໃຫ້ການສັນຈອນໄປມາຖືກຕັດຂາດເດີນທາງດ້ວຍລົດແມ່ນບໍ່ໄດ້ ແລະ ຄາດວ່າລະດັບນໍ້າຈະເພີ່ມຂຶ້ນເລື້້ອຍໆ ເຊິ່ງລະດັບນໍ້າເຊກອກທີ່ແທກໄດ້ໃນເວລາ 13 ໂມງຂອງມື້ນີ້ແມ່ນຢູ່ທີ່ 10,30 ແມັດ ແລະ ຈະຍັງຄົງເພີ່ມຂຶ້ນຕື່ມ, ສະນັ້ນຈຶ່ງຂໍໃຫ້ພໍ່ແມ່ປະຊາຊົນທີ່ຢູ່ໃນເຂດພື້ນທີ່ສ່ຽງຈົ່ງໄດ້ມີຄວາມກຽມພ້ອມຢູ່ຕະຫຼອດເວລາ ແລະ ຄາດວ່າຝົນຈະຍັງຄົງສືບຕໍ່ຕົກຢູ່ໃນໄລຍະ 1-2 ວັນຂ້າງໜ້ານີ້.
