ຕາມຂ່າວຈາກ ຮ່າໂນ້ຍ, ວັນທີ12ຕຸລານີ້,ຄະນະກຳມະການ ສູນກາງ ເພື່ອຂັບເຄື່ອນ ຄວບຄຸມ ແລະ ປ້ອງກັນ ໄພທຳມະຊາດ ຂອງຫວຽດນາມ ຖະແຫລງວ່າ:ມີຜູ້ປະສົບໄພ ນ້ຳຖ້ວມ ເຂດຊົນນະບົດ ຂອງແຂວງ ເຖືອທຽນເວ້, ກວ໋າງນາມ, ກວ໋າງບິ່ງ, ກວ໋າງຈິ ແລະ ກວ໋າງງາຍ ເຮັດໃຫ້ມີຜູ້ເສຍຊີວິດ 18 ຄົນ ແລະ ສູນຫາຍອີກ 14 ຍ້ອນກະແສນ້ຳໄຫລພັດ ຢ່າງຮຸນແຮງ.ຂະນະທີ່ ກອງທັບຫວຽດນາມ ນຳໃຊ້ເຮີລີກົບແຕ້ ອອກປະຕິບັດ ການຊ່ວຍເຫລືອ ຊາວປະມົງ 8 ຄົນໃນທ້ອງທະເລ ທີ່ມີຄື້ນລົມພັດຮຸນແຮງ ຂອງແຂວງກວ໋າງຈິ.
ໃນຈຳນວນນີ້ ມີຊາວປະມົງ ເສຍຊີວິດ 3 ຄົນ ແລະ ອີກ 3 ຄົນສູນຫາຍ. ຂະນະນີ້ ເຈົ້າໜ້າທີ່ກ່ຽວຂ້ອງ ໄດ້ຍົກຍ້າຍປະຊາຊົນ 45.800 ກວ່າຄົນ ອອກຈາກພື້ນທີ່. ສ່ວນເຮືອນປະຊາຊົນ 109.000 ກວ່າຫລັງ ຖືກນ້ຳຖ້ວມຂັງ ແລະ ມີ 382 ຫລັງໄດ້ຮັບຄວາມເສຍຫາຍຢ່າງໜັກ.
ເນື້ອທີ່ເຮັດນາ ໄດ້ຮັບຄວາມເສຍຫາຍ ເກືອບ 580 ເຮັກຕາ ແລະ ພື້ນທີ່ປູກຝັງ 38.000 ກວ່າເຮັກຕາ ຖືກນ້ຳຖ້ວມຂັງ.ນອກນີ້ ຍັງມີສັດລ້ຽງ ປະເພດງົວ ແລະ ສັດປີກ 150.800 ໂຕ ຕ້ອງຕາຍ ຫລື ຖືກກະແສນ້ຳພັດພາ.
ຂະນະນີ້້ ຫວຽດນາມ ຍັງກຽມຮັບມືກັບພາຍຸຫົວໃໝ່ ທີ່ພວມເຄື່ອນຕົວ ມາຈາກທະເລຈີນໃຕ້ ແລະ ຄາດວ່າ ຈະສົ່ງຜົນໃຫ້ເກີດຝົນຕົກໜັກອີກຄັ້ງ.
ຮຽບຮຽງຂ່າວໂດຍ ສະໄຫວ
