ໃນວັນທີ 4 ພຶດສະພາ 2020 ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງ ໄຊຍະ ບູລີ, ພ້ອມດ້ວຍພາກສ່ວນກ່ຽວຂ້ອງ ລົງຊຸກຍູ້ຕິດຕາມ ການລະບາດໄຂ້ຍຸງລາຍ ຢູ່ທີ່ ບ້ານນາບວມ ເມືອງພຽງ ແຂວງໄຊຍະບູລີ ໂດຍການໂຄສະນາ ໃຫ້ຄວາມຮູ້ຕໍ່ກັບປະຊາຊົນ ເຮັດວຽກງານສຸຂະສຶກສາ ແລະ ນຳພາ ປະຊາຊົນ ເຮັດອະນາໄມຕາມເຮືອນຊານ ບ້ານຊ່ອງຂອງຕົນ, ອະນາໄມສະຖານທີ່ສາທາລະນະຂອງບ້ານ ເພື່ອທຳລາຍແຫລ່ງເພາະພັນ ຂອງໜອນນ້ຳ-ຍຸງລາຍ ແລະ ພົ່ນຢາຂ້າຍຸງລາຍ.
ໃນໄລຍະຜ່ານມາ, ເມືອງພຽງ ແຂວງໄຊຍະບູລີ ໄດ້ມີການລະບາດ ຂອງພະຍາດໄຂ້ຍຸງລາຍ ໃນເບື້ອງຕົ້ນ ເຊິ່ງຢັ້ງຢືນຜົນກວດ ຈາກຫ້ອງວິເຄາະແລ້ວ ວ່າມີກໍລະນີຕິດເຊື້ອ ໄຂ້ຍຸງລາຍທັງໝົດ 12 ກໍລະນີ. ໃນນີ້, ບ້ານ ນາບວມ ມີ 9 ກໍລະນີ, ບ້ານ ໜອງບົວຊາຍ 1 ກໍລະນີ ແລະ ບ້ານ ນາແວນ 1 ກໍລະນີ ແລະ ຍັງບໍ່ມີກໍລະນີເສຍຊີວິດ. ມາຮອດປັດຈຸບັນ ແມ່ນໄດ້ຮັບການປີ່ນປົວຫາຍດີ ແລະ ອອກໂຮງໝໍແລ້ວ 11 ກໍລະນີ ແລະ ຍັງນອນປີ່ນປົວຢູ່ໂຮງໝໍເມືອງ 1 ກໍລະນີ.
ໂອກາດນີ້, ທ່ານ ນາງ ບຸນພັກ ອິນທະປັນຍາ ໄດ້ເນັ້ນໜັກໃຫ້ກັບ ພາກສ່ວນກ່ຽວຂ້ອງ ຂອງແຂວງ ເມືອງ, ບ້ານ ພ້ອມດ້ວຍປະຊາຊົນ ພາຍໃນບ້ານ ຈົ່ງໄດ້ພ້ອມກັນຮີບຮ້ອນ ເອົາໃຈໃສ່ຢ່າງຮີບດ່ວນ ໃນການຮັບມື ກັບການລະບາດ ຂອງພະຍາດດັ່ງກ່າວ ໃຫ້ມີປະສິດທິຜົນ ແລະ ໝົດໄປ ໂດຍການເປັນເຈົ້າຕົນເອງ ໃນການເຮັດສຸຂະອະນາໄມ ຂັ້ນຄອບຄົວ ແລະ ພາຍໃນບ້ານຂອງຕົນ ໃຫ້ມີຄວາມສະອາດ, ປະຕິບັດມາດຕະການຕ່າງໆ ທີ່ເປັນການທຳລາຍແຫລ່ງ ເພາະພັນຂອງ ໜອນນ້ຳ-ຍຸງລາຍ ແລະ ທີ່ສຳຄັນແມ່ນຕ້ອງປະຕິບັດຕາມ 5 ປ ທີ່ກະຊວງສາທາລະນະສຸກ ວາງອອກໃຫ້ເຂັ້ມງວດ ແລະ ເປັນປົກກະຕິ ພ້ອມກັນກຳ ຈັດພະຍາດ ດັ່ງກ່າວ ໃຫ້ໝົດໄປໂດຍໄວ ແລະ ໃຫ້ມີປະສິດທິຜົນດີ, ເພື່ອປອດໄພຈາກການລະບາດ ຂອງພະຍາດໄຂ້ຍຸງລາຍ ໃນຄັ້ງນີ້ ໃຫ້ໄດ້ຮ້ອຍສ່ວນຮ້ອຍ.
ຂ່າວ: ແສງສຸດາ ກີ່ງສະຫວັດ, ນາງ ສຸລິວັນ ເພັງມະນີ
